الو صديقي بيار ..! خيي وحبيب قلبي بيار.. وينك ؟ الو ..!! ليش ما عم ترد؟! صرلي يومين بطلبك وما بترد ، تعودنا ليليه نسهر ساعة عل التلفون من تلات سنين بدون توقف ، اذا تأخرت وما طلبتك كان ينشغل بالك وتطلبني ، والعكس كان يصير معي. ..
صديقي يا اصدق صديق و رفيق من عمر طويل ..مش معقول صدق انك فارقتني وسبقتني بهل السرعة ، كنت تخبرني عن وجعك وتقللي يا خيي جان انا مش موجوع من جسمي قد ما موجوع من الناس ، من بعض الناس الانجاس ، البلا وفا وبلا احساس ، يللي كنت جنبهم وقدامهم وخلفهم ، وتخللو عني وتنكرولي وباعوني متل ما يوضاس باع المسيح بابخس ثمن وسلمو للجلادين .
.
ولا يهمك يا بيارو ما بدي عدد انجازاتك الكبيري على المسرح وعلى شاشات التلفزة والسينما بلبنان والعالم العربي ، علمت جمهورك البسمة والضحكة الاصيلي مش المزيفه والمصطنعة والمقلدة ، وكأنك خلقت تترفع الهم عن القلوب الحزيني ، والهم كان عم ياكل من حياتك .
.
ولا يهمك يا بيارو يمكن الله ريحك من هل الناس الانجاس ، ولكن ترك صدمة كبيري بقلوب محبيك والمعجبين فيك وبالفن الراقي يللي جسدتو بكل عمل قمت فيه وتعملقت وكنت انت خلف نجاحو ، الله يرحم صديقنا الفنان الكبير فيليب عقيقي سلمللي عليه ، رح ينبسط فيك كتير لانو كان يحبك ويقدر فنك الراقي ، ومرة من المرات كان قاعد فيليب حدي بافتتاح مسرحية بكازينو لبنان ، شفتو عم يضحك من قلبو ، سألتو : ” يا استاذ فيليب اول مره بشوفك عم تضحك هل القد” جاوبني بهضامتو المعهودة وقللي بصراحة انا اول مرة بضحك بمسرحية مترجمها صاحبها وناقلها ومنجرها وناحتها بحرفيتها متل عادتو عن مسرحية انكليزية ، انا عم اضحك ع حركات بيار وتقمصو ببراعة للشخصية العم يجسدها “.
وهيدا بيار روعة من الروعات، بينسى انو اسمو بيار شمعون هوي وعم يمثل ، وبصدق قبل ما يصدق المشاهدين انو هوي الشخصية الحقيقية العم يلعبها ، و بيحمل الاسم الحقيقي لبطل القصة .
ضيعانك يا بيار ضيعانك يا صديق العمر .. اكيد من اليوم ورايح رح ترتاح من قرف هل الارض اللعيني .، معليش اذا ع الارض طلع عمرك قصير ، عمرك الطويل والابدي رح يكون اكيد بالجنه لانك كنت “قديس الفن” .
الوداع يا صديقي ..
من قلب مكسور
جان خالد 2/7/2022
