خشبة صليبك
خشبة صليبك ع الجبل ..
نصّين مقسومي.
وع هالخشب
غاب العمر بكّير.
بتفكّرا عالغيم مرسومي
ومن كترت التبخير
بتصير أيقوني.
في نصّ عم شوفو
تاكي على مريم ..
ونصّ تاني عليك يا يسوع
وع التقل عم بميل.
والغصن حولو إكليل شوك يصير
وتاج لملك الملوك
اللي ماتّ ع الصليب
ومن عمق سرّ الموت
يبشّر بالقيامي
ت يحقق المكتوب
وحلم السما الكبير.
وخشبة صليبك ع الجبل …
نصّين مقسومي
وع خشبتا لصوبك…
هالعمر بدّو يطير.
